سوال: میرا سوال یہ ہے کہ جو لوگ بطور منت سولہ سیدہ کا روزہ رکھتے ہیں اور ایک کتاب ہوتی ہے جس میں من گھڑت کہانی ہوتی ہیں، اسے عورتیں سنتی ہیں اور اسی میں منت مانتی ہیں روزہ رکھنے کی کہ اگر میرا فلاں کام ہوگیا تو میں سولہ سیدہ کا روزہ رکھوں گی اور دوبارہ سے اسی کتاب کو پڑھواؤں گی- کیا ایسا کرنا درست ہے؟
الجواب باسم ملھم الصواب
واضح رہے کہ نذر نیکی کی منعقد ہوتی ہے جبکہ صورتِ مسئولہ میں کہانی سننا نہ عبادت ہے اور نہ ہی یہ کہانی شرعاً درست ہے، بلکہ بی بی سیدہ کی کہانی کے نام سے عوام میں رائج کہانیاں من گھڑت اور خلافِ حقیقت ہیں۔ اس لیے کہانی سننے کی نذر ماننے سے یہ نذر منعقد ہی نہیں ہوئی اور نہ ہی اس کا پورا کرنا جائز ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حوالہ جات:
1:بدائع الصنائع میں ہے:
( ومنها ) أن يكون قربةً فلايصح النذر بما ليس بقربة رأسا كالنذر بالمعاصي بأن يقول : لله عز شأنه علي أن أشرب الخمر أو أقتل فلاناً أو أضربه أو أشتمه ونحو ذلك؛ لقوله عليه الصلاة والسلام: { لا نذر في معصية الله تعالى}، وقوله : عليه الصلاة والسلام: { من نذر أن يعصي الله تعالى فلايعصه }، ولأن حكم النذر وجوب المنذور به، ووجوب فعل المعصية محال، وكذا النذر بالمباحات من الأكل والشرب والجماع ونحو ذلك لعدم وصف القربة لاستوائهما فعلاً وتركاً (10/327)
2:س… اگر کوئی خاتون یہ منّت مانے کہ اگر میرا فلاں کام پورا ہوجائے تو خاتونِ جنت کی کہانی سنوں گی۔ میں نے بھی تین سو دفعہ خاتونِ جنت کی کہانی سننے کی منّت مان رکھی ہے، لیکن تین سو دفعہ سننا دُشوار ہورہا ہے، آپ کوئی حل بتلائیں۔
ج… خاتونِ جنت کی کہانی من گھڑت ہے، نہ اس کی منّت دُرست ہے، نہ اس کا پورا کرنا جائز، آپ اس منّت سے توبہ کریں، اس کے پورا نہ کرنے کی وجہ سے پریشان نہ ہوں”۔ (آپ کے مسائل اور ان کا حل،5/198، ط:مکتبہ لدھیانوی)
3:ایک دوسری جگہ لکھتے ہیں:
ج… ”وصیت نامہ“ کے نام سے جو تحریر چھپتی اور تقسیم ہوتی ہے،وہ تو خالص جھوٹ ہے، اور یہ جھوٹ تقریباً ایک صدی سے برابر پھیلایا جارہا ہے، اسی طرح آج کل”معجزہ زینب علیہا السلام“ اور ”بی بی سیدہ کی کہانی“ بھی سو جھوٹ گھڑ کر پھیلائی جارہی ہے۔ (3 /515، ط:مکتبہ لدھیانوی)
والله سبحانه وتعالى اعلم
19جمادی الاخری1444
تاريخ:12/1/23
