مفتی انس عبدالرحیم
ایذاء مسلم سے بچیں!
مسجد میں جہاں جس کے جوتے رکھے ہوئے ہوں ان کو ہٹا کر اپنے جوتے وہاں نہیں رکھنے چاہئیں ۔ کیونکہ جس نے وہاں پہلے جوتے رکھ دیے تو اس کو جوتے ڈھونڈنے میں پریشانی ہوگی جو کہ ایذاء مسلم ہے اور ایذاء مسلم حرام ہے ۔
انگلیوں کو انگلیوں میں ڈالنا پسندیدہ نہیں: حضرت ابو سعید خدری رضی اللہ عنہ سے روایت ہے کہ رسول اللہ ﷺ نے ارشاد فرمایا : ” جب تم میں سے کوئی مسجد میں ہو تو وہ ہر گز اپنی انگلیوں کو انگلیوں میں نہ ڈالے اس لیے کہ انگلیوں کو انگلیوں میں ڈالنا شیطان کی طرف سے ہے ۔ ” ( رواہ احمد باسناد حسن ،کمانی الترغیب : 1/ 137 )
قرآنی آیات اور نقش ونگار :
محراب اور قبلہ کی دیوار کے جتنے حصے تک نمازی کی سیدھی نظر نماز کی حالت میں جاسکتی ہے ،اتنے حصے پر نقش ونگار اور قرآنی آیات لگانا پسند نہیں ۔ مکروہ تنزیہی ہے ۔ کیونکہ ان سے نماز میں دھیان بٹتا ہے ۔ ( ھندیہ :5/319 )
گھونسلے ہٹانا جائز ہے : مسجد میں چمگادڑ ۔ چڑیا یا کبوتر نے اپنا گھونسلا بنا لیا ہو،جس کی وجہ سے مسجد میں کچرا اور گندگی کی پھیلتی ہو تو انڈوں بچوں سمیت بھی اس کو ہٹانا جائز ہے ۔ (ھندیہ : 5/ 322)
مسجد کی دیوار پر اشتہار : مسجد کی دیوار پر اشتہار لگانے کا کیا حکم ہے ؟
حضرت مولانا یوسف لدھیانوی شہید رحمہ اللہ نے اس کے بارے میں بیت خوبصورت بات لکھی ہے : ” مسجد کے دروازوں اور دیواروں پر اشتہار چپکانا دو وجہ سے ناجائز ہے۔ ایک یہ کہ مسجد کی دیوار پر اپنے مکان کا شہتیر (گاڈر ) یا کڑی رکھے ۔
دوسر وجہ یہ ہے کہ مساجد کی تعلیم اور صفائی کا حکم دیاگیا ہے اور مسجد پر اشتہار لگانا، اس کی بے ادبی ہے اور گندہ کرنا بھی ہے ۔کیا کوئی شخص گورنر ہاؤس کے دروازے پر اشتہار لگانے کی جرات کرسکے گا ؟ اور کیا اپنے مکان کے درودیوار پر مختلف النوع کے اشتہار لگائے جانے کو پسند کرے گا ؟ ( آپ کے مسائل 3/146)
مسجد میں تصویر: اسلام میں جاندار کی تصویر بنانا حرام ہے۔ حرام کام مسجد میں کیسے جائز ہوسکتا ہے ؟ تصویر والےا خبار ، تصویر والا لباس یا تصویر والی کتاب بھی مسجد میں لانا درست نہیں۔ تمام مسلمانوں کو چاہیے کہ وہ مسجد کا احترام کرتے ہوئے ممنوع تصاویر بنائیں !
حدیث نبوی ﷺ ہے :
” فرشتے اس مکان میں داخل نہیں ہوتے جس میں کتا یا کسی جاندار کی تصویریں موجود ہوں” ( زادالطالبین )
راستہ میں نماز نہ پڑھیں ! اسلام ہمیں یہ سکھاتا ہے کہ نماز کی نیت ایسی جگہ نہ باندھیں جو نمازیوں کی گزرگاہ ہو،نمازی کے آگے سے گزرنا گناہ کبیرہ ہے۔ اگر کسی نے راستہ میں نیت باندھ لی تو اس کی وجہ سے دوسرے نمازی حضرات کا خواہ مخواہ گناہ گار ہونے کا خطرہ ہے۔علماء کرام نے لکھا ہے کہ جو شخص مسجد میں محفوظ جگہ ہونے کے باوجود گزرگاہ میں نماز کی نیت باندھ لےوہ اپنی نماز کا احترام خود اپنے ہاتھوں کھو دیتا ہے۔اگر کوئی شخص اس کے سامنے سے گزر جائے تو اس کا گناہ خود نماز پڑھنے والے پر ہے ، گزرنے والے نہیں ،نمازیوں کو اس حرکت سے جو تشویش اور پریشانی ہوتی ہے اس کا گناہ اس کے علاوہ ہے۔اس لیے ہمیں چاہیئے کہ مسجد میں ہم ایسی کوئی حرکت نہ کریں !
کسی کی پیٹھ پیچھے نیت باندھ لینا :
بعض لوگ محفوظ جگہ ہونے کے باوجود دوسرے شخص کی پیٹھ پیچھے نماز کی نیت باندھ لیتے ہیں ۔ دوسرا آدمی اس کی وجہ سے وہاں قید ہو کر رہ جاتا ہے کہ جب تک وہ سلام نہ پھیرے یہ کہیں جا نہیں سکتا ۔ شرعی مسئلہ تو یہ ہے کہ اگر آپ کی پیٹھ کے پیچھے کوئی شخص نماز کی نیت باندھ کر کھڑا ہوجائے تو آپ وہاں سے اٹھ کر جاسکتے ہیں ۔ یہ نمازی کے سامنے سے گزرنے کے حکم میں نہیں ، کیونکہ آپ اس کے سامنے سے اٹھے ہیں۔ لیکن عموم ا اس مسئلہ سے عوام الناس واقف نہیں اور وہ سامنے سے اٹھنے کو بھی گناہ سمجھتے ہیں اس لیے جہاں لوگوں کی اس غلط فہمی کو دور کرنے کی ضرورت ہے وہاں اس کی بھی ضرورت ہے کہ کسی پشت کے پیچھے نماز نہ پڑھی جائے تاکہ مسئلہ سے ناواقف مسلمان خواہ مخواہ پریشانی سے دور چار نہ ہوں۔
اگلی صفیں پر کریں !
تمام نمازوں میں عموما ً اور جمعہ میں خصوصاً اس کا خاص خیال رکھنا چاہیے کہ مسجد میں اگر آپ پہلے جائیں تو اگلی صفوں خالی ہوتی ہیں ۔ جس کی وجہ سے بعد میں آنے والوں کو تنگی کا سامنا کرنا پڑتا ہے اور جب وہ گردنیں پھلانگ کر آگے جانے کی کوشش کرتے ہیں تو ہمیں تکلیف ہوتی ہے ! اس لیے سہولت اور راحت اسی میں ہے کہ پہلے آنے والے پہلی صفوں میں بیٹھیں ، پیچھے نہیں ۔
ایک دوسری حدیث میں ہے کہ ” پہلی صفوں پر اللہ تعالیٰ کی خاص نظر رحؐت ہوتی ہے اور فرشتے پہلی صفوں والے نمازویوں کے لیے دعائے رحمت کرتے رہتے ہیں ۔ “
ایک دوسری حدیث میں ہے کہ ” مردوں کی بہرتین صفیں پہلی والی صفیں ہیں اور بدترین صفیں آخری صفیں ہیں “۔ ( مسلم )
گردنیں نہ پھلانگیں : جو شخص لوگوں کی گردنیں پھلانگ کر آگے جاتا ہے حدیث میں آتا ہے کہ ” ایسا شخص جہنم کا پل بنایا جائے گا تاکہ لوگ اسے روندیں ۔ ” اس حدیث کا اطلاق ہر اس صورت پر ہوتا ہے جس میں لوگوں کی گردنیں پھلانگی جائیں ۔ مثلا نماز کے بعد بھکاری کا گردنیں پھلانگ کر جانا۔ (ایسے بھیک مانگنے والے کو کچھ ینا بھی حرام ہے ) فرض نماز ختم ہونے کے بعد دعا اور ذکر واذکار میں مشغول نمازیوں کی گردنیں پھلانگ کر جانا، تعلیم اور عام تقریبات اور محفلوں میں لوگوں کی گردنیں پھلانگ کر آگے جانا، جمعہ کی نماز میں اگلی صفوں میں جانے کے لیے گردنیں پھلانگنا وغیرہ ۔
حضرت مولانا اشرف علی تھانوی ؒ فرماتے ہیں کہ اس حرکت کے چار گناہ ہیں : (1)ایذاء مسلم (2) تکبر کا اظہار (3) مسلمانوں کی تحقیر (4) ریاکاری کہ میں بڑا نمازی ہوں ۔ پہلی صف میں نماز پڑھتا ہوں ۔ ان میں سے ہر ایک سخت جرم ہے لہذا اس سے سخت پرہیز کریں ۔
بیت الخلاء میں پانی اچھی طرح بہائیں : اگر کب ھی مسجد کے بیت الخلاء میں استنجا کرنے کی ضرورت پیش آجائے تو پانی اچھی طرح بہانے کا بھرپور اہتمام کرنا چاہیے ! تاکہ مسجد میں بدبو نہ پھیلے ۔
بدبو نہ پھیلائیں !
مسجد کے بیت الخلاء سے بدبو کسی صورت نہیں آنی چاہیے !مسجد کو بدبو سے بچانے کی اہمیت کا اندازہ اس سے کیاجاسکتا ہے کہ معتکف کو بھی مسجد میں ہوا خارج کرنے کی اجازت نہیں ،اس کے لیے وہ مسجد سے باہر جائے جیسے استنجاء کے لیے جاتا ہے ( ھندیہ جلد 5 )
