کیا آپ شوہر کا دل جیتنا چاہتی ہیں ؟
کچھ تدبیریں آزمالیں !
ہر عورت اپنے شوہر کے دل کو تسخیر کرنے کی خواہش رکھتی ہے ۔ اس کے لیے کبھی وہ شوہر کے معدے کے ذریعے دل میں اترنے کی راہ تلاش کرتی ہے تو کبھی اپنے نازو وادا کے ذریعے اس کا دل جیتنے کی کوشش کرتی ہے تاہم یہ فیصلہ اسے خود ہی کرنا پڑتا ہے کہ شوہر کو اپنا اسیر ( قیدی)بنائے رکھنے کے لیے وہ کون سی تدبیریں اختیار کرے کیونکہ ہر مرد کا مزاج اور اس کی پسند ناپسندعلیحدہ ہوتی ہے ۔ محبت کو قبول کرنے اور اس کے اظہار کاطریقہ ہر شخص کا الگ ہوتا ہے لہذا ضروری نہیں کہ آپ کی سہیلیاں اور آپ کی بے تکلف کزنز اس سلسلے میں جو ترکیبیں بتائیں وہ آپ کیلئے کار گر ثابت ہوں کیونکہ ہر ایک کا تجربہ الگ ہوتا ہے تاہم یہاں آپ کے لیے ماہرین ازدواجیات زندگی کے تجویز کردہ کچھ ایسے یقینی طریقے بیان کیے جارہے ہیں جو عام طور سے ہر شادی شدہ مرد کے لئے مؤثر ثابت ہوتے ہیں ۔
آپ کا پر اعتماد رویہ : مرد اپنی بیویوں میں خودا عتمادی کا وصف دیکھنا پسند کرتے ہیں۔ اگر آپ کا شوہر یہ جان لے کہ وقت پڑنے پر آپ اپنا خیال رکھ سکتی ہیں تو اس بات پر وہ خود کو خاصا پر سکون محسوس کرے گا ۔ آپ کا یہی اعتماد دراصل آپ کی خوبصورتی ہے کیونکہ شادی کے کچھ عرصے بعد مرد بیوی کے بناؤ سنگھار اور ظاہری خوبصورتی کی بجائے اس کے طور طریقوں اور رویے کے باعث اس کی قدر کرتا ہے۔یہی وجہ ہے کہ اکثر اوقات بعض خواتین اس وقت بڑی مایوس ہوتی ہیں جب وہ افزائش حسن پر اچھے خاصے پیسے اور وقت برباد کر کے بھی شوہر کی توجہ پانے میں ناکام رہتی ہیں ۔
موقع شناس بنیں : زندگی میں بہت سے نشیب فراز آتے ہیں اور مشکل وقت میں ہی کسی جوڑے کے مابین حقیقی محبت کا انداز ہ ہوتا ہے ۔ لہذا ہر کٹھن وقت میں شوہر کا سہارا بنیں اور اس کے شانہ بشانہ رہیں لیکن اپنی شناخت ہر صورت قائم رکھیں اور اپنی پسند وناپسند کے بارے میں شوہر کو ضرور آگاہ رکھیں ۔ اگر خوشنودی پانے کے چکر میں ہمیشہ ان کی ہر بات پر آمنا صدقنا کہتی رہیں تو یقین جانیں کہ وہ خود زندگی کی اس یکسانیت سے بور ہوجائیں گے ۔لہذا زنسگی میں تنوع لانے کے لئے بھی ان کی بات مانیں توکبھی اپنی منوائیں ۔ شوہر کی رائے کا احترام ضروری ہے لیکن ایک راز کی بات جان لیں کہ شوہر ہمیشہ اس بات کو پسند کرتا ہے کہ آپ اپنی ایک رائے رکھتی ہیں ۔ تاہم موقع محل کی نزاکت کو دیکھتے ہوئے ہر بات کا فیصلہ کرنا بہتر ہوتاہے ۔
شوہر کو نظر انداز نہ کریں : بہت سی خواتین گھریلو معاملات میں خود کو آئیڈیل ثابت کرنے پر ساری توجہ صرف کردیتی ہیں ا ور سمجھتی ہیں کہ ان کی اس خوبی سے شوہر بہت متاثر ہوگا۔ گھر کی ہر چیز کو چمکا کر رکھیں گی ، انواع واقسام کے کھانے تیار کرلیں گی ۔ اس میں کوئی شبہ نہیں کہ ہر مرد سجا سجایا گھر اور بنی سنوری بیوی کو پسند کرتا ہے ۔ لیکن اس کے ساتھ ساتھ وہ بیوی کو دلچسپ اور زندگی سے بھرپور شخصیت کے طور پر دیکھنا چاہتا ہے جس کے ہمراہ وہ اچھے دوست کی مانند پر لطف وقت گزارسکے ۔ لہذا مرد جب شام کو تھکا ہارا گھر پہنچتا ہے تو گھر چمکتے ہوئے دیکھنے کی بجائے آپ کی توجہ اور مسکراہٹ کا منتظر ہوتا ہے ۔ سو، مسکرا کر اس کا استقبال کریں اور اسے وقت دیں ۔ جو خواتین شوہر کے مزاج کو سمجھتی ہیں اور انہیں وقتا فوقتاً اپنے رویے کے باعث خوشگوار حیرت سے دو چار کرنے کی صلاھیت رکھتی ہیں۔وہ یقیناً شوہر کے دل میں گھر کر جاتی ہیں۔
ہر وقت تعاقب میں رہنا اچھا نہیں: بیشتر خواتین ہر وقت شوہروں کے پیچھے لگی رہتی ہیں دفتر جانے کے بعد خواہ مخواہ کال کر کے احمقانہ سوالات پوچھتی ہیں اور اس طرح گویا ان پر اپنی بے پایاں محبت کا اظہار کرتی ہیں لیکن اس رویے سے مرد بہت جلد بے زار ہوجاتے ہیں کیونکہ انہیں محسوس ہوتا ہے کہ ان کی ٹوہ لگائی جارہی ہے ۔ اس طرح دونوں کے درمیان ایک دوری سی آجاتی ہے اور آپ کو اندازہ بھی نہیں ہوپاتا کہ آپ کا مسلسل تعاقب میں رہنا ہی دراصل تعلقات میں سرد مہری ک اسبب ہے ۔ لہذا اپنے اس معمول کوترک کردیں اس کے بعد آپ دیکھیں گی کہ آپ کا تعلق پہلے سے زیادہ مضبوط ہوگیا ہے ۔
شوہر کی نقل نہ کریں : بعض خواتین شوہر محبت میں بالکل ان کے جیسی بننے کی کوشش کرتی ہیں ۔ ان کا خیال ہوتا ہے کہ شوہر کی نقل کر کے وہ اس کے دل سے بے حد نزدیک ہوجائیں گی ۔ اپنی محبت میں وہ شوہر کی عادات واطوار کو کچھ اس طرح اپناتی ہیں کہ ہو بہو اس کا عکس نظر آنے لگتی ہیں۔ پھر یہیں سے اختلافات جنم لیتے ہیں کیونکہ جب دو افراد ایک طرح سوچتے اور عمل کرتے ہیں تو ان کے درمیان ٹکراؤ ضرور ہوتا ہے ۔ سو اس بات پر غور کریں کہ کیا آپ کا شوہر اپنی کاربن کاپی کو پسند کرے گا ؟ پہلے پہل جب اس نے آپ کو پسند کیاتھا تو آپ کی انفرادی خوبیوں کی بناپر ہی کیاتھا۔ لہذا آپ جیسی ہیں ویسی ہی رہیں ۔ جب اپنے مخصوص رنگ میں دکھائی دیں گی تو شوہر آپ کی شخصیت میں زیادہ کشش محسوس کرے گا
